Nagpain ang United States Department of Agriculture (USDA) sang $34.1 million para sa isa ka proyekto sa pagpauswag sang industriya sang ube (purple yam) sa Pilipinas, nga ginalauman nga makabenepisyo sa ginabanta 12,500 ka mga mangunguma sa sulod sang lima ka tuig.
Ini ang base sa anunsyo ni US Ambassador to the Philippines Lee Lipton, sa pahayag nga ginbalhag sang US Embassy sa Pilipinas sa social media.
Ang proyekto igapatuman sang TechnoServe sa idalom sang Food for Progress Program sang USDA.
Suno kay Lipton, ang pondo naghalin sa pagbaligya sang halos 40,000 metric tons sang soybean meal gikan sa US.
Ginhatagan man pagtamod ni Lipton nga ang ube isa ka importante nga sangkap sa paghimo sang makabag-o nga mga produkto sa pagkaon kag ilimnon sa nagkalainlain nga bahin sang kalibutan, lakip ang Amerika.
Ang proyekto ginalauman nga magapabakod sa value chain sang ube sa pungsod halin sa produksyon kag pagproseso tubtob sa paghimo sang mga produkto nga high value crops.
