Nakabatyag sang pagkadismaya ang grupo nga General Alliance of Workers Association ukon GAWA sa gin-aprobahan nga P40 tubtob P45 nga pagpasaka sang minimum wage para sa mga private sector workers sa Western Visayas.
Sa interview sang Bombo Radyo kay Wennie Sancho, secretary general sang GAWA, iya ginpahayag nga indi pa ini bastante sa nagapadayon nga pagsaka sang presyo sang mga balaklon kag nagadugang nga pangabudlay sang mga mamumugon.
Nahibaluan nga nagpagwa ang Regional Tripartite Wages and Productivity Board ukon RTWPB-6 sang Wage Order No. 30, nga ginpirmahan sang tanan nga miyembro sang board.
Sa idalom sang amo nga wage order, magadugang sang P40 ang minimum wage sang mga mamumugon sa non-agricultural establishments nga may kapin sa 10 ka empleyado, halin sa P550 mangin P590 kada adlaw.
Samtang ang mga non-agricultural establishments nga may 10 ukon mas manubo nga numero sang empleyado, magataas man ang minimum wage halin sa P525 mangin P565 kada adlaw, matapos ang P40 nga pagpasaka.
Sa agricultural sector naman, magadugang sang P45 ang minimum wage halin sa P520 mangin P565 kada adlaw.
Nagalaum man ang natungdan nga mas padalman ang nagagamay nga purchasing power sang mga konsumidor agud mahatagan man sang nagakaigo nga solusyon.
