CAPIZ-Ginpalig-on sang provincial government sang Capiz ang nahibal-an kag kapasidad sang mga quarry operators kag iban pa nga stakeholders sa pagpanghanda kag pagtubag sa mga kalamidad, lakip ang pagpanalipod sa palibot sa mga operasyon sang quarry.
Pinaagi sa Capiz Provincial Environment and Natural Resources Office (CaPENRO), ginpatigayon sang probinsya sa pagpanguna ni Governor Fredenil H. Castro ang pagsinapol nga may tema nga “Capacity Development on Disaster Management: Enhancing Risk Reduction and Response in Quarry Operations from Mitigation to Recovery” sang Oktubre 26, 2026, sa Governor’s Hall, Provincial Capitol, Roxas City.
Ginbuksan ni Ronald Allan F. Cullo, EnP, ENR Officer, ang aktibidad kag ginpabug-atan ang importansya sang pagpalambo sang kapasidad sang mga stakeholder agud masiguro ang responsable nga pagmina sang quarry materials, husto nga pagpanghanda sa kalamidad kag epektibo nga pagtubag sa mga emerhensya.
Ginpahayag naman kanday Salve Marie Cullo kag Karen Grace A. Salarda sang Bureau of Internal Revenue (BIR) ang mga obligasyon sa buhis sang mga quarry operator. Samtang, ginpaathag ni Engr. Vinzson C. Suerte ang mga pamaagi sa rehabilitation, recovery kag environmental restoration agud mabalik kag maprotektahan ang kahimtang sang palibot nga mahimo maapektuhan sang operasyon sang quarry.
Nagtambong sa aktibidad ang mga quarry operator, permittee, aplikante kag iban pa nga stakeholder agud mapalapad ang ila pagsabot sa disaster risk reduction and management, pagsunod sa mga regulasyon kag responsibilidad sa pagpanalipod sa palibot.
Paagi sa sini nga inisyatibo, ginapadayon sang provincial government paagi sa CaPENRO ang panikasog nga masiguro ang mas luwas, responsable kag malungtarong operasyon sang quarry sa Capiz, halin sa pagpugong kag pagpanghanda sa kalamidad tubtob sa pagtubag, rehabilitasyon kag pagbangon halin sa mga epekto sini.
