Ginmandu ni Senate Committee on Public Services Chairperson Sen. Raffy Tulfo ang Manila International Airport (MIA) nga magsumiter sa sulod sang 48 oras sang kompleto nga report parte sa kondisyon sang tanan nga closed-circuit television (CCTV) camera nga yara sa idalom sang ila pagdumala.
Ginhimo ni Tulfo ang mando matapos nga napabutyag sa trial sang komite nga may mga CCTV sa airport nga wala nagagana.
Paagi sa iya mando, luyag ni Tulfo nga mahibaluan ang kabug-usan nga status sang mga CCTV, lakip na kun diin ang mga nagagana kag wala nagagana, agud mahibaluan kun ano nga mga bahin sang sistema ang nagakinahanglan sang pagkay-o.
Importante ang husto nga pag-operate sang mga CCTV sa airport para sa seguridad kag sa pag-usisa sang mga insidente nga mahimo matabo sa sulod sang pasilidad.
Ginalauman nga makabulig ang ginapangayo nga report sa paghibalo sang mga problema nga kinahanglan sulbaron kag sang mga tikang nga dapat himuon sang administrasyon sang airport agud malikawan ang posible nga mga kaso sang pagpangawat sa amo nga lugar.
