Ginpasalig ni President Ferdinand R. Marcos Jr. nga handa kag alerto ang mga ahensya sang gobyerno sa pagsabat sa ginalauman nga pagdagsa sang mga biyahero nga nagapauli sa ila tagsa ka probinsya subong nga Undas.
Suno Presidente, nagbutang sang nagkalain-lain nga tikang ang gobyerno agud masiguro ang kaluwasan sang mga pasahero kag mamentinar ang katawhay sa mga lugar nga ginalauman nga magagutok sang publiko.
Lakip diri ang pagtapos sang mga mayor nga dalan nga ginakay-o, paghatag sang special permit sa masobra isa ka libo ka mga bus, kag pagpatuman sang relaxation order sang Maritime Industry Authority (MARINA) sa mga depasahero nga barko agud madugangan ang numero sang mga pasahero nga nagapauli sa ila mga probinsya.
Ginmanduan man ni Marcos ang Bureau of Immigration (BI) nga siguraduhon nga bastante ang numero sang mga personnel kag wala na sang bakante nga immigration counters umpisa subong nga adlaw tubtub Nobyembre 3 agud mapadasig ang proseso sang mga pasahero.
Samtang, maga-assign man sang mga tinawo ang Metropolitan Manila Development Authority ukon MMDA nga magabulig sa pag-regulate sang dalagan sang trapiko, partikular sa palibot sang mga sementeryo, samtang padayon naman ang monitoring sang Philippine National Police (PNP).
Nagpanugyan ang Presidente sa publiko nga magkadto sang temprano sa mga terminal kag sundon ang ginapatuman nga mga pagsulundan agud masiguro ang luwas kag matawhay nga pagdumdom sa ila nagtaliwan nga mga pinalangga.
