Kuntento naman ang Department of Agriculture (DA) nga mabatyagan sang mga konsumidor ang pagnubo sang presyo sang mga karne sa local market pag-abot sang Nobyembre ukon Disyembre.
Ini kasunod sang pinal nga pag-apruba ni President Ferdinand Marcos Jr sa dugang nga kadamuon sang mais nga i-import sang pungsod.
Bangud sang bag-o nga laye, ginpataas ang Minimum Access Volume para sa importasyon sang mais halin sa nagligad nga 220,000 metric tons pakadto sa 500,000 metric tons.
Suno kay Agriculture Spokesperson, Asec. Arnel De Mesa, daku nga bulig ang pagsaka sang mais nga iga-import agud masabat ang problema sa livestock industry nga amo ang mataas nga presyo sang feeds ukon pagkaon sang kasapatan.
Suno sa iya, pat-od gid nga mabuhinan ang gasto sa pagkaon para sa mga hinuptanan kag malikawan ang pagtaas sang presyo sang karne, sa tion nga magtaas ang stock ukon supply sang mais nga amo ang nagapanguna nga ingridients sa paghimo sang mga pagkaon sang sapat.
Ginsiling sini nga ang bag-o nga tikang ang kabahin sang pangako sang gobyerno sang PH nga amligan ang mga hog raisers kag padakuon ang livestock industry sa bug-os nga pungsod.
