Pormal na nga nagsugod ang Bangsamoro Autonomous Region in Muslim Mindanao (BARMM) sang bag-o nga hugnat sang demokratiko nga pagdumala, kasunod sang madinalag-on nga pagpatigayon sang pinakauna nga Bangsamoro Parliamentary Elections.
Ginkabig ni President Ferdinand Marcos Jr. nga isa ka makasaysayan nga kadalag-an para sa Bangsamoro kag sa bug-os nga pungsod ang pagbukas sang una nga sesyon sang una nga napilian nga Bangsamoro Parliament.
Ginhatagan pagtamod ni Marcos ang importansya sang kalinong kag ginpasalamatan ang mga lider nga nagtinguha agud malab-ot ang peace agreement sa tunga sang gobyerno kag Moro Islamic Liberation Front (MILF).
Ang 80 ka mga napilian nga mga katapo sang Parliamento ginalauman nga magapili sang ila Chief Minister, Speaker, kag iban pa nga mga opisyal agud pormal nga magporma sang una nga regular nga gobyerno sang parliamento sa rehiyon.
Ginpasalig ni President Marcos nga padayon nga suportahan sang national government ang self-government sang Bangsamoro, subong man sa mga programa nga nagatuyo sa pagpabakod sang palangabuhian kag pag-uswag sang rehiyon.
Nagalaum ang Presidente nga magabukas ang bag-o nga hugnat sang pagdumala padulong sa mas malinong kag mainuswagon nga Bangsamoro.
