Natalana nga magapatindog sang bag-o nga multi-purpose covered gym ang Barangay Baybay sa Roxas City agud mangin lugar para sa nagkalain-lain nga aktibidad kag programa sang barangay.
Sa interview sang Bombo Radyo kay Barangay Kagawad Earl Valencia, iya ginpahayag nga nakabakal ang barangay sang lote nga yara 800 square meters nga nagabalor sang P6 million para tukuron ang amo nga pasilidad.
Suno kay Valencia, ini ang mangin una nga multi-purpose covered gym nga maga-alagad sa mga pumuluyo sang nasambit nga barangay.
Dugang pa sini, magamit ang pasilidad sa nagkalain-lain nga aktibidad, programa kag mga pagtililipon sang barangay.
Ginalauman naman nga masugudan na sini nga tuig ang pagtukod sang covered gym agud mahatagan sang mas maayo nga pasilidad ang mga residente sang Barangay Baybay.
