Gin-appoint ni President Ferdinand Marcos Jr. si Supreme Court Associate Justice Rodil V. Zalameda bilang masunod nga Chief Justice sang Korte Suprema.
Gin-anunsyo ni Presidential Communications Office (PCO) Secretary Lino Cayetano ang nasambit nga appointment kun sa diin si Zalameda ang magabulos kay Chief Justice Alexander Gesmundo nga natalana nga magaretiro subong nga adlaw.
Ginhatagan pagtamod ni Cayetano nga si Zalameda nagadala sang masobra tatlo ka dekada sang dungganon nga serbisyo sa justice system, halin sa court official and public prosecutor pakadto sa Court of Appeals kag sa Korte Suprema.
Suno sa PCO, ginkilala sang Presidente ang importansya sang eksperyensyado kag may prinsipyo nga liderato agud mapabilin ang pagsalig sang publiko sa hudikatura.
Si President Marcos nagpahayag man sang bug-os nga pagsalig nga pagahimuon ni Zalameda ang iya bag-o nga papel nga may integridad, impartiality, kag malig-on nga commitment sa rule of law.
Kadungan sini, nagpalab-ot man sang pagpanginbulahan ang Palasyo kay Zalameda sa iya bag-o nga responsibilidad kag sinsero nga pagpasalamat kay Gesmundo sa iya dedikado nga pagserbisyo sa pungsod.
