AMAGA, Sigma, Capiz – Arestado ang isa ka Street Level Individual sa ginpatigayon nga buy-bust operation sa Barangay Amaga, Sigma, Capiz.
Ang suspek amo si alyas Mark, 30-anyos, Bartender kag residente sang nasambit nga lugar.
Sa interview sang Bombo Radyo kay Police Major Narciso V Sables Jr., Officer-in-Charge sang Sigma Municipal Police Station, iya ginpahayag nga si alyas Mark nalakip sa Provincial Priority Target List sang kapulisan sang Oktubre 2026 bangud sa kaangtanan sini sa ilegal nga pagduso sang iligal nga droga.
Suno kay Sables, antes ang operasyon, nagpatigayon ang kapulisan sang intelligence gathering kag monitoring, lakip ang pag-validate sang mga impormasyon nga ila nabaton agud makilala ang mga aktibidad kag estratehiya sang suspek.
Ang kaangay gani sini nga kaso ginpaidalom pa sa plea bargain agreement ukon kasugtanan nga naga-angkon sang sala sa mas mamagan nga kaso, suno sa mga kondisyon nga ginatugutan sang layi.
Lakip sa nakuha sa iya ang 12.4 grams sang iligal drugs nga nagabalor sang 84,320.00, 1 heat sealed transparent plastic sachet bilang buy-bust item, dugang man sa nakuha sa iya posisyon ang 6 heat sealed transparent plastic sachet, P500 buy-bust money, kag nagkalain-lain nga non-several drug item. Kun sa diin ang mga nakuha sa iya ginpanginwala man sang suspek ang pagpanag-iya sang mga ebidensya nga narekober sa iya.
Pahayag pa niya, wala sang na-record nga iban nga criminal record ukon reklamo batok sa suspek nga may kaangtanan sa ilegal nga droga sa banwa sang Sigma. Samtang suno sa pagpangusisa ang supply sang suspek nagahalin ini sa Roxas City.
Sa karon, ang suspek yara na sa kustodiya sang Sigma MPS para sa nagakaigo nga disposisyon kag dugang man sa ginapanawagan sang Sigma MPS ang kooperasyon sang mga pumuluyo pinaagi sa pagpaabot sang impormasyon parte sa ginapatihan iligal nga mga aktibidad nga mahimo ini nga i-report direkta sa police station gamit hotline sang kapulisan, kag agud maprotektahan ang identidad sang nagreport ukon witness ini ila ginatago.
