Nagapreparar na ang pamunuan sang Barangay Ambilay sa banwa sang Panitan, Capiz, para sa posible nga epekto sang Super El Niño, ilabi na sa sektor sang agrikultura kag suplay sang tubig.
Sa interview sang Bombo Radyo kay Punong Barangay Juan Baulite, iya ginpahayag nga magapatigayon sila sang pagsinapol agud makakuha sang mga suhestyon kag ideya halin sa mga pumuluyo kon ano ang mga tikang nga mahimo nila ipatuman bilang preparasyon.
Suno kay Baulite, may naeksperyensyahan pa sila nga pag-ulan sa ila lugar rason nga madamo pa sa mga mangunguma ang nagapadayon sa pagtanom sang palay bangud bastante pa ang suplay sang tubig.
Pahayag pa sini, halos tanan nga talamnan sa ila barangay ang malapit sa suba nga mahimo man nila mangin source sang tubig para sa pagpanguma kon mag-umpisa na ang malawig nga tig-ilinit.
Nagalaum man ang punong barangay nga indi tuman nga maapektuhan sang El Niño ang ila barangay, ilabi na ang mga mangunguma nga nagasalig sa suplay sang tubig halin sa suba para sa ila mga talamnan.
