Naghatag sang inspirasyon sa publiko ang isa ka blood donor matapos ginpakigbahin ang iya personal nga istorya kag rason sa pagdonar sang dugo sa ginpatigayon nga Dugong Bombo 2026.
Sa interview sang Bombo Radyo kay Police Staff Sergeant Hercon C. Monding, Freedom of Information (FOI) Action Police Non-Commissioned Officer (PNCO) sang Capiz Police Provincial Office (CPPO), iya ginpahayag nga ang iya iloy nga nagtaliwan sang nagligad nga tuig bangud sa balatian amo ang nangin personal nga inspirasyon niya sa pagdonar sang dugo.
Suno kay Monding, mismo niya nga nasaksihan ang importansya kag daku nga kinahanglanon sang dugo sang nagmasakit ang iya iloy. Bangud sini, nangin paagi niya ang pagdonar sang dugo agud mapadayon ang maayo nga inspirasyon nga iya nabaton halin sa iya iloy.
Aminado man ini nga may kahadlok kag pagduhaduha siya sang una sa pagdonar sang dugo. Apang bangud sa mga eksperyensya nga naagyan sang ila pamilya, napalig-on ang iya kaugalingon nga mangin maisog kag maghatag sang dugo agud makabulig sa iban.
Dugang pa sang natungdan, ang blood donation indi lamang isa ka buluhaton nga nagahatag sang bulig sa mga tawo nga nagakinahanglan sang dugo, kundi isa man ini ka paagi sa paghatag sang paglaum kag kahigayunan nga mabuhi sa mga pasyente.
