Dungan nga nagdonar sang dugo ang isa ka mag-asawa halin sa Carles, Iloilo bilang pagpakigbahin sa tuigan nga bloodletting activity nga Dugong Bombo 2026.
Sa interview sang Bombo Radyo kay Zaldy Hautea Jr. kag iya asawa nga si Rhoda Hautea, ginpahayag nila nga bisan halin pa sila sa banwa sang Carles, Iloilo, ginpili nila nga magbiyahe pakadto sa probinsya sang Capiz agud magdonar sang dugo kag mangin kabahin sang nasambit nga aktibidad.
Suno kay Zaldy, nangin tuigan na nga tradisyon sang ila mag-asawa ang pagdonar sang dugo, bangud nagapati sila nga daku ang mabulig sini sa mga tawo nga nagakinahanglan sang dugang nga suplay sang dugo.
Pahayag pa niya, ginapabilin nila ang prinsipyo nga “always, even in pain,” nga nagakahulugan nga bisan may mga balatian, kahadlok ukon kasakit nga maeksperyensyahan, dapat padayon gihapon ang pagbulig sa isigkatawo.
Paagi sa ila pagpakigbahin, ginapakita sang mag-asawa nga ang pagdonar sang dugo indi lamang personal nga desisyon kundi isa man ka simple nga paagi agud makabulig kag makaluwas sang kabuhi sang iban.
