Ginakabig sang Department of Agriculture-Bureau of Fisheries and Aquatic Resources (DA-BFAR) Region VI nga importante ang closed fishing season halin Nobyembre 15 tubtob Pebrero 15 para sa tatlo ka klase sang isda nga sardinas, tamban kag alumahan sa Visayan Sea.
Sa interview sang Bombo Radyo kay Regional Director Remia A. Aparri, DA-BFAR Region VI, iya ginpahayag nga paagi sa sini nga tikang, mahatagan sang kahigayunan ang mga isda nga magpangitlog kag magpadamo.
Suno kay Aparri, ang temporaryo nga pagdumili sa pagpangisda ang nagatuyo nga maprotektahan ang mga isda, masiguro ang padayon nga suplay sini kag mapadayon ang pangabuhian sang mga mangingisda.
Ginpahanumdom man sini ang mga mangingisda nga may penalidad nga paga-atubangon sang mga malapas sa pagsulundan kag magapangisda sa mga lugar nga sakop sang closed fishing season.
Sa probinsya sang Capiz, temporaryo nga ginadumilian ang pagpangisda sa mga kadagatan nga sakop sang Roxas City, Pilar, Pontevedra kag President Roxas bilang kabahin sang pagpanalipod kag pagpadamo sang mga isda sa Visayan Sea.











