Ginapabaskog ang kampanya para sa pagpugong sang pag-abuso sa illegal nga droga bilang kabahin sang pagsaulog sang Drug Abuse Prevention and Control o DAPC Week 2026.
Sa interview sang Bombo Radyo Roxas kay Retcol Primo Golingay, Focal Person sang Provincial Anti-Drug Council, ginatalakay ang importansya sang paghatag sang husto nga impormasyon kag edukasyon sa publiko, ilabi na sa mga kabataan, agud malikawan ang paggamit kag pag-abuso sang illegal nga droga.
Ginapabug-atan man ang papel sang pamilya, eskwelahan kag komunidad sa paggiya sa mga kabataan agud indi sila madalahig sa illegal nga droga.
Kabahin man sa ginahatagan sang importansya ang paghatag sang suporta sa mga indibidwal nga nagakinahanglan sang bulig kag rehabilitation agud makabalik sa husto nga pagpangabuhi.
Suno kay Golingay, importante ang pagbinuligay sang nagkalain-lain nga sektor sang komunidad agud mangin epektibo ang kampanya kontra illegal nga droga.
Ginpahanumdom man ang publiko nga ang pagpugong sa drug abuse indi lamang responsibilidad sang gobyerno kundi responsibilidad sang tagsa ka pumuluyo.











