-- ADVERTISEMENT --

Ginpatawag sang kamposang depensa ni Vice President Sara Duterte ang apat ka testigo nga magahatag sang ila testimonya sa nagapadayon nga impeachment trial agud pamatukan ang mga alegasyon batok sa iya nahanungod sa ginaalegar nga unexplained wealth ukon indi maathag nga ginhalinan sang iya manggad.

Suno sa ginpaambit ni Impeachment Court spokesperson Atty. Reginald Tonggol, una nga magatindog si Atty. Rainer Dela Fuente sang Anti-Money Laundering Consulting Philippines agud magpaathag nahanungod sa mga probisyon sang Anti-Money Laundering Act ukon AMLA.

Magasunod naman nga magahatag sang testimonya sanday Department of Trade and Industry Undersecretary kag Board of Investments Managing Head Dr. Ceferino Rodolfo, Food and Drug Administration Director Pilar Pagayunan, kag representantative sang Center for International Trade Expositions and Missions nga si Mendo Rowena III.

Ang ila testimonya ang natuhoy sa iskedyul sang pagparehistro kag operasyon sang Cale88 Foods Corporation, lakip na ang mga produkto sini nga banana chips.

Una na nga ginpahayag ni Senator-Judge Juan Miguel Zubiri nga luyag niya mahibaluan ang ginhalinan kag kon diin nagkadto ang ginaalegar nga P300 million nga mga deposito nga nagsulod sa Cale88, kag kon nagbayad bala ang kompanya sang nagakaigo nga buhis.

-- ADVERTISEMENT --

Samtang, ginpahanumdom naman ni Senate Minority Leader kag Senator-Judge Alan Peter Cayetano nga dapat ibase sa klaro kag mabakod nga ebidensya ang desisyon sang Senado, kun maabswelto man ukon ma-convict ang Bise Presidente.

Dugang pa ni Cayetano, mahimo magresulta sa dalagku nga problema ang desisyon nga wala sang bastante nga basehan, ilabi na nga nagapadayon ang deliberasyon sa 2027 national budget kag ang krisis sa ekonomiya.