Nag-abot na si President Ferdinand “Bongbong” Marcos Jr. sa Shenzhen Bao’an International Airport sa China kag First Lady Liza Araneta-Marcos, agud magtambong sa 33rd Asia-Pacific Economic Cooperation (APEC) Economic Leaders’ Meeting.
Gilayon nga nagtambong ang Presidente sa isa ka gala dinner nga pagasundan sang mga aktibidades kag meetings sa masunod nga duha ka adlaw.
Lakip sa natalana nga aktibidad ni Marcos subong nga Huwebes amo ang bilateral meetings upod sa mga lider sang Peru, Papua New Guinea kag Chile agud istoryahan ang mga bagay may kaangtanan sa ekonomiya kag negosyo.
Suno kay Philippine Ambassador to China Jaime Florcruz, importante para sa Pilipinas nga magpartisipar sa kasubong nga sinapol bangud ang mga desisyon nga ginahimo sang mga lider sang mga miyembro nga ekonomiya sang APEC mahimo nga may epekto sa pangkalibutanon nga polisa, negosyo, presyo kag supply sang mga produkto.
Posible man nga istoryahan sa bilateral meetings ang isyu sang taripa ukon buwis sa mga imported kag exported nga mga produkto, ilabi na kon ang mga nagapasakop nagalakip sang pila sa pinakadaku nga ekonomiya sa kalibutan.
Katuyuan sang APEC Leaders’ Meeting nga mapabaskog ang rehiyonal nga kooperasyon sa ekonomiya kag pagbinuligay sang mga miyembro nga ekonomiya sa Asia-Pacific region.











