-- ADVERTISEMENT --

Nagpanagtag ang Roxas City Government sang kabug-usan nga 1,429 ka sako sang bugas assistance sa mga benepisyaryo sa Barangay Dayao, Roxas City, bilang kabahin sang programa nga Bugas Para sa Roxas kag BBM Rice Assistance.

My kabug-usan nga 1,111 ka sako sang regular rice assistance halin sa Roxas City Government kag dugang nga 318 ka sako sang BBM Rice Assistance halin sa nasyonal nga gobyerno.

Sa interview sang Bombo Radyo kay Punong Barangay Wennie Batuampo, iya ginpahayag nga lakip sa mga benepisyaryo sang programa sa BBM rice ang mga miyembro sang LGBT community, teachers kag solo parents.

Suno kay Batuampo, may yara sang mga criteria ang sa city government nga ginasunod sa pagpanagtag sang bugas, wala nalakip ang mga regular nga empleyado sang City Hall, teachers, kapulisan kag Bureau of Fire Protection .

Pahayag pa niya, ang mga residente nga wala pa nakabaton sang bugas assistance ginapangabay nga magpadulong sa Barangay Dayao Hall agud mag-fill out sang form kag maghatag sang impormasyon nahanungod sa mga miyembro sang ila panimalay kag petsa sang pagkatawo. Kinahanglan man nga magpresentar sang valid ID agud malikawan ang doble nga pag-claim sang bugas sa nagkalain-lain nga barangay.

-- ADVERTISEMENT --

Dugang pa niya, may yara man sang mga reklamo nga naatubang ang barangay sa tion sang distribusyon, partikular sa mga benepisyaryo nga indi personal nga makakuha sang ila bugas bangud may trabaho. Gani, ginapahanumdom sila nga ang mismo nga nakapangalan sa ayuda amo ang dapat magkuha sini sa masunod nga distribusyon.

Sa karon, ginapasiguro ni Batuampo nga magapadayon ang programa bangud napasar na ang ordinansa sang syudad nga nagatugot sa regular nga pagpanagtag sang bugas. Ginapangabay man niya ang mga residente nga magsumiter sang kinahanglanon nga requirements agud ma-validate ang ila impormasyon kag mahatagan sang kahigayunan nga makabenepisyo sa programa.