I-prioritize ni Gilas Pilipinas head coach Tim Cone ang iya papel sa national team labaw sa Barangay Ginebra para sa palaabuton nga FIBA world Cup Asian Qualifiers Window 5 sa Nobyembre 27 tubtob 29 sa Seremban, Malaysia.
Suno kay Cone, magabyahe pakadto sa Malaysia ang 12-man Gilas squad sa Sabado agud magpreparar sa ila hampang batuk sa Syria sa Nobyembre 27 kag Iran sa Nobyembre 29.
Importante ang duha ka hampang para sa Gilas nga sa subong may yara sang 4-4 nga record sa Group E kag kinahanglan nga makarekord sang tatlo ka daug sa katapusan nga apat ka hampang agud madugangan ang ila tsansa nga makasulod sa 2027 FIBA world Cup sa Qatar.
Ang bag-o nga naturalized nga humalampang nga si Bennie Boatwright ang magapanguna sa team sa baylo sang napilasan nga si Justin Brownlee.
Bangud sa preparasyon sang national team, wala nakatigayon sang full rehearsal si Gilas sa Pilipinas kag tipunon lamang ni Cone ang mga players sa Malaysia.
Samtang aminado naman si Cone nga mangin hangkat ini para sa Barangay Ginebra bangud Disyembre 1 pa ang ila pagbalik kag natalana sila nga maghampang sa PBA Governors’ Cup sa Disyembre 4.
Gintawag sini nga sakripisyo sang organisasyon sang Ginebra agud unahon ang kinahanglanon sang national team.











