-- ADVERTISEMENT --

Indi makabig nga bastante sang Bayan Panay ang bag-o nga pagtaas sang minimum wage sa Western Visayas bangud suno sa grupo, nagapabilin nga mabudlay ang kahimtangan sang mga mamumugon bangud sa nagataas nga presyo sang mga balaklon kag panguna nga kinahanglanon.

Sa interview sang Bombo Radyo kay Elmer Forro sang Bayan Panay, ginpahayag sini nga bisan may dugang nga sweldo ang mga mamumugon, indi gihapon ini bastante agud masabat ang ila adlaw-adlaw nga panginahanglanon bangud wala nagaundang ang pagsaka sang presyo sang mga balaklon kag serbisyo.

Nahibaluan nga umpisa sini nga Nobyembre 20, 2026, nagpatuman na sang bag-o nga minimum wage increase sa Western Visayas sa idalom sang Wage Order No. VI-(WESTERN VISAYAS)-30.

Sa idalom sang nasambit nga wage order, nagtaas sang P40 kada adlaw ang sweldo sang mga mamumugon sa non-agriculture, industrial kag commercial establishments nga may kapin sa 10 ka empleyado, halin sa P550 nangin P590.

Samtang ang mga establisemento nga may 10 ukon mas manubo nga empleyado, nagtaas man sang P40 ang minimum wage halin sa P525 nangin P565 kada adlaw. Ang mga agricultural workers naman nagabaton sang dugang nga P45, halin sa P520 nangin P565 kada adlaw.

-- ADVERTISEMENT --

Lakip man sa pagtaas sang sweldo ang mga domestic workers ukon kasambahay nga magabaton sang dugang nga P500 kada bulan, gani magataas sa P7,000 ang ila monthly minimum wage halin sa P6,500.