-- ADVERTISEMENT --

Daku ang mangin bulig sang pagpatukod sang Balay Silangan sa mga indibidwal nga nahumaling sa ilegal nga buluhaton, ilabi na sa paggamit sang ilegal nga droga, agud mahatagan sila sang oportunidad nga magbag-o kag makabalik sa husto nga pagpangabuhi.

Sa interview sang Bombo Radyo kay Melvin Galagate, head sang Roxas City Communications Group, ginpahayag sini nga nangin madinalag-on ang ginpatigayon nga ground breaking ceremony para sa pagpatukod sang Balay Silangan sa Barangay San Jose, Roxas City.


Nahibaluan nga kapin 1,000 square meters nga lote ang gindonar sang pamilya Sicad sa Roxas City Government.

Suno kay Galagate, daku ang importansya sang Balay Silangan bangud indi lamang ini mangin temporaryo nga ilistaran sang mga drug offenders nga nagsungka kundi mangin sentro man sang ila rehabilitasyon kag pagbag-o.

Sa idalom sang programa, pagahatagan ang mga benepisyaryo sang counseling, values formation kag espirituwal nga mga hilikuton. May yara man sang livelihood training sa bulig sang TESDA, lakip ang mga seminar tuhoy sa ikaayong lawas, kasuguan kag alternatibo nga edukasyon agud mangin handa sila sa pagbalik sa komunidad.

-- ADVERTISEMENT --

Ang nasambit nga pasilidad may pondo nga masobra sa P20 milyon kag may kapasidad nga makaakomodar sang tubtob 75 ka persona.

Ginalauman nga paagi sa sini nga proyekto, mas madamo nga indibidwal ang mahatagan sang ikaduha nga tsansa sa kabuhi paagi sa rehabilitasyon, pagbag-o sang panghunahuna kag paghatag sang oportunidad para sa matarong nga palangabuhian.