-- ADVERTISEMENT --

Pormal na nga gintapos sang Bureau of Fire Protection (BFP) ang deployment para sa 49th ASEAN Summit kag iban pa nga related summits sa Demobilization Ceremony nga ginpatigayon sa Aseana City Open Grounds, Parañaque City.

Kapin sa 1,500 ka BFP personnel halin sa National Capital Region kag nagkalain-lain nga rehiyon ang gindeploy, upod ang mga fire truck, ambulansya kag espesyal nga emergency response vehicles agud magsiguro sang seguridad kag maghatag sang fire protection, medical assistance, search and rescue kag iban pa nga emergency services.

Sa seremonya, ginpasalamatan ni BFP Officer-in-Charge FCSUPT Wilberto Rico Neil A. Kwan Tiu, DSC, upod sa iban nga mataas nga opisyal sang Bureau, ang dedikasyon kag sakripisyo sang mga personnel nga nangin kabahin sang operasyon.

Gindayaw man niya ang pagsalig nga ginpakita sang internasyonal nga mga delegado, lakip na ang delegasyon sang India nga naghingyo nga may BFP personnel nga magpabilin sa ila bilang kasiguruhan kag proteksyon.

Samtang nagbalik na ang mga personnel sa ila tagsa ka istasyon, ginpahayag sang BFP nga padayon nga pagapabilinon ang kahandaan, propesyonalismo kag kooperasyon sa iban nga ahensya agud masiguro ang kaluwasan sang publiko.

-- ADVERTISEMENT --

Ang madinalag-on nga deployment nagapakita sang dedikasyon sang BFP sa pagserbisyo kag pagpanalipod sa pumuluyo nga may dungog, katutom kag integridad.