Nagpahayag si Iran’s Foreign Minister Abbas Araqchi nga nagalaum gihapon ang Iran nga paagi sa diplomasya ukon malinong nga pagpakig-angot, matapos na ang nagapadayon nga gira sa tunga sang ila pungsod kag Estados Unidos. Samtang, ginpahayag ni US President Donald Trump nga gusto sang Iran nga magkasarig sa kasugtanan, apang indi ini nagakabagay sa iya nga mga kondisyon.
Suno kay Araqchi, padayon ang pagbayluhanay sang mga mensahe sa tunga sang Iran kag Estados Unidos paagi sa bulig sang mga tigpatunga. Gusto sang Iran nga makab-ot ang kasugtanan nga makasiguro nga indi na liwat magluntad ang gira.
Dugang pa niya, kinahanglan anay sang Iran sang kasiguruhan nga seryoso ang Estados Unidos sa pagpakig-negosasyon antes magpadayon sa mas madalom nga pag-istoryahanay. Ginalantaw man sang duha ka kampo ang mga tikang nga makabulig sa pagpat-od sang ila pagsalig sa isa kag isa.
Isa sa mga ginapabilin nga kondisyon sang Iran amo ang pagpabilin sa ila pungsod sang uranium nga ginpaidalom sa mataas nga lebel sang enrichment. Apang suno kay Araqchi, posible gihapon nga makab-ot ang patas nga kasugtanan nga nagasunod sa interes kag kinahanglanon sang ila pungsod. Antes sini, ginapanugyan man ang posibilidad nga pahuy-an ang lebel sang enrichment sang uranium sa idalom sang pagmonitor sang International Atomic Energy Agency ukon IAEA.
Suno sa IAEA, may yara sang 440.9 ka kilo nga uranium ang Iran nga na-enrich sa 60 porsyento sang tion nga gin-atake sang Israel kag Estados Unidos ang ila mga pasilidad nukleyar sang Hunyo 2025. Apang indi pa klaro kon pila sa sini ang nabilin matapos ang pag-atake.
Samtang, ginpahayag ni Trump sa press conference sang Biyernes nga gusto sang Iran nga magkasarig sa kasugtanan, apang indi ini nagakabagay sa mga kondisyon nga iya ginabaton.
Nagdugang ang girianay matapos mag-atake ang Estados Unidos kag Israel sa Iran sang Pebrero 28, nga ginsundan sang pagbalos sang Iran paagi sa pag-atake sa Israel kag sa mga Gulf states nga may mga base militar sang Amerika.
Sa pihak sini, nagtipon ang mga opisyal sang Qatar kag Iran sang Martes agud istoryahan ang mga paninguha nga mapalapit ang ila mga panindugan kag mapanubo ang indi pag-uyon sa mga ginapanugyan nga kasugtanan.











