Naglab-ot na sa P10.44 billion ang kabug-usan nga gasto sang kahalitan kag kapierdihan nga narekord sang Department of Agriculture (DA) sa sektor sang agrikultura bangud sa grabe nga epekto sang El Niño.
Masobra 338,000 ka mga mangunguma kag mangingisda ang tuman nga naapektuhan matapos nag-igo ang EL Niño sa masobra 332,000 ka ektarya sang uma sa nagkalain-lain nga bahin sang pungsod, kon sa diin nahalitan ang humay, mais, kamoteng kahoy, high-value crops, kag kasapatan.
Bilang sabat, ang departamento nakadul-ong na sang P18.64 billion nga balor sang bulig sa mga apektado nga sektor paagi sa bulig pinansyal, binhi, abono, kag crop insurance.
Ginpasalig sang DA nga nagapabilin sila nga nakatutok sa sitwasyon agud mabantayan ang kadakuon sang kahalitan kag masiguro ang nagakaigo nga supply sang pagkaon sa pihak sang nagapadayon nga tag-ilinit.











