Nagpanguna ang probinsya sang Capiz sa may pinakadaku nga kahalitan sa agrikultura tuga sang nagapadayon nga epekto sang El Niño phenomenon sa bug-os nga Western Visayas.
Sa interview sang Bombo Radyo kay Mr. Raul Fernandez, Regional Director sang Office of Civil Defense (OCD) Region VI, iya ginpahayag nga sa sini nga sitwasyon posible magpadayon nga ang epekto sang El Niño sa nagkalain-lain nga probinsya sa rehiyon.
Suno kay Fernandez, naglab-ot sa P335,143,343 million ang kabug-usan nga kahalitan sa agrikultura sa Capiz.
Mas mataas ini kon ikumparar sa probinsya sang Iloilo nga naglab-ot sa P249.7 million kag Aklan nga may P21.1 million nga kahalitan, samtang Antique ang may pinakamubo nga recorded damage nga P368,980.32.
Pahayag pa sini, naglab-ot naman sa 13,793 ka mangunguma kag manugpangisda sa Capiz ang apektado sang El Niño, nga may kabug-usan nga 9,933.92 ka ektarya sang mga pananom nga naapektuhan.
Bangud sini, ginapadayon sang natungdan ang pagmonitor kag pagpanghanda sang mga ahensya sang gobyerno kag lokal nga panguluhan agud maminusan ang epekto sang tig-ilinit, ilabi na sa sektor sang agrikultura kag sa mga pamilya nga apektado sini.











