Ginapanawagan ni Acting Davao City Mayor Sebastian “Baste” Duterte sa mga supporters sang anay Presidente Rodrigo Roa Duterte nga magtipon sa The Hague sa Setyembre 23 para sa confirmation of charges hearing sa International Criminal Court (ICC).
Suno kay Mayor Duterte, ang pagtililipon amo ang pagpamatuod sang kusog kag paghiliusa sang Duterte camp, nga una na napakita sa 2016 kag 2025 elections.
“Fight for your former President, Rodrigo Roa Duterte, be here in The Hague. We will gather ourselves peacefully and show all the support that we can,” suno kay Mayor Duterte. Upod man sang alkalde ang iya mga utod nga sanday Vice President Sara Duterte, Davao City Rep. Paolo Duterte, kag Veronica Duterte sa pagbisita sa ila amay sa ICC detention facility matapos ini nagrequest nga makita sila tanan.
Ginpahayag ni Mayor Duterte nga masadya kag mataas gihapon ang pagtuo sang anay presidente matapos ang ila sini nga pagkit-anay.
Apang iya gin-ako nga wala sila nag-istorya parte sa 2028 elections, kundi mas nagtinir sila sa personal nga estorya kag politika.
Samtang, ginpahayag ni VP Sara Duterte nga ginpasugtan sila nga magdala sang paborito nga softdrinks sang ila amay, apang ginhingyo sang nurse nga indi magdala sang pagkaon bangud sang iya mataas nga sugar level.
Nagpasalamat man ang pamilya Duterte sa ila mga supporters kag sa ICC detention unit sa pagtugot sa ila nga makabisita sa ila amay.
