ROXAS CITY – Ginklaro sang tagdumalahan sang Teodoro Arcenas Trade Center (TATC) ang ginpalab-ot nga concern sang pila ka mga vendor sang isda sa nasambit nga merkado.
Sa interview sang Bombo Radyo kay Mrs. Heloise Mendoza, market administrator, ginpahayag sini nga ginsarado ang gate sa nalikod nga porsyon sang fish section bangud may ginaplano ang gobyerno sang syudad para diri agud mabuhinan ang mga sidewalk vendors sa TATC.
Gani para sa kaayuhan sang merkado ang pagahimuon nga pagsarado sa amu nga pertahan.
Nahibaluan nga ba-se sa ginpalab-ot sang pila ka mga vendors, suno diri nga gamay nalang ang nagapadulong sa nalikod nga bahin sang fish section, bangud sa una nga porsyon na sang balaligyaan ang ginabaklan sang mga customer.
Ginpanginwala man ini sang administrador, bangud suno diri, sa iya paglibot sa lugar, makita sini nga may nagapadulong nga mga bumalakal sa nasambit nga puwesto.
Samtang, ginpahayag ni Mendoza nga nagnubo ang pagsuloktan sa puwesto sang mga fish vendor, sa nauna nga P100, subong P50 nalang kada adlaw ang ginasukot, sang asosasyon.
