MAAYON CAPIZ – Dako ang pagpasalamat sang alkalde sa banwa sang Maayon matapos naga-isahanon ini nga wala sang kontra para sa palaabuton nga 2025 Local and National Elections.
Sa interview sang Bombo Radyo kay Maayon Mayor Raymund “Mon-Mon” Malapajo, ginpahayag sini nga wala niya ginalauman ang ini nga sitwasyon bangud base sa monitoring sang Commission on Elections (COMELEC) may yara sang mga nagkuha sang form para sa pagka-alkalde kag bise-alkalde sa ila banwa.
Suno kay Malapajo, isa sa mga rason nga iya nahibaluan kung ngaman wala ini sang kontra sa eleksyon bangud nakit-an suno diri sang mga Maayonan ang iya performance kag serbisyo nga ginahatag sa iya nasakupan.
Mahibaluan nga ini na ang katapusan nga termino sang alkalde sa iya posisyon.
Kaangut sini wala man sang kontra ang iya bise-alkalde nga si Jose Claveria Dapulaza para sa palaabuton nga pagpiniliay.
Sa pihak sini, ginakasubo man ni Malapajo nga ang iya mga Sangguniang Bayan Member may yara sang kontra sa isa kag isa.
