ROXAS CITY – Nag-file sang reklamo sa Office of the Ombudsman si Mayor Christopher Andaya batuk kay Vice Mayor Stephen Alayon, bangud sa ginaalegar paggamit sang pondo nga wala nag-agi sa insakto nga proseso.
Sa interview sang Bombo Radyo kay Mayor Andaya, ginkumpirmar sini nga sang Setyembre 2021 pa ini nag-file sang complaint sa Ombudsman batuk kay Vice Mayor Alayon bangud sa ginapahayag illegal use of public fund.
Kaangay nalang suno diri sang paggamit sang Maintenance and Other Operating Expenses (MOOE) bilang Aid to Individual in Crisis Situation (AICS) kag savings sang opisina sang bise-alkalde nga gingamit para sa financial assistance sang mga pumuluyo.
Ini nga bulohaton nga i-convert ang MOOE ukon savings fund sa Financial Assistance ang indi sang gahom sang legislative department, rason nga makabig ini nga iligal, dugang pa ni Andaya.
Natukiban suno diri ni Andaya ang nasambit nga buluhaton ni Alayon sang nagpadulong sa iya ang tatlo ka mga Sangguniang Bayan members nga sanday SB Speed Pelaez, Fernando Capapas kag Jaime Apoyo kag ginpahayag nga may irregular nga pagdisburse sang pondo.
Ginpanginwala man ni Andaya nga wala sang lamud pamulitika ang pagpasaka sini sang complaint batuk kay Alayon.
Nahibaluan nga may kabug-osan nga P265,800 ang ginapahayag nagamit nga pondo ni Alayon sumugod sang Enero tubtob Setyembre tuig 2020.
