ROXAS CITY -Gin-ako sang isa ka anay nagahupot sang mga exotic animals nga sa iya naghalin ang cobra nga nakabuntog patay sa grade 10 student sa Barangay Bago, Roxas City.
Sa eksklusibo nga interview sang Bombo Radyo kay Niño Garcia, sang Jaro, Iloilo City bulan sang Pebrero sang narescue sini ang nasambit nga cobra nga gintumod sini nga Naja Philippinensis ukon Philippine Cobra nga ginapatihan nakabuhi sa tag-iya.
Ginsaysay ni Garcia nga ginakumbinse siya sang biktima nga ihatag na lamang sa iya ang man-og bangud iya ini nga dream snake.
Apang makapila kabeses sini nga ginbalibaran ang biktima bangud tuman kadelikado nga huptan ang nasambit nga man-og.
Gindugang pa sini nga wala ini nagpasugot sa luyag sang biktima tubtob wala ini ginapasugtan sang iya mga ginikanan.
Ginpanindugan man ni Garcia nga wala ini nagkulang sa pagpahumdum sa biktima nga indi pag-uyatan ang nasambit nga cobra bangud tuman gid ini ka delikado.
Makapila man ka beses nga ginaakigan ni Garcia ang biktima sa tagsa ka makita sini nga gina-uyatan ang cobra.
Samtang gin-athag ni Garcia nga nagsalig ini sa biktima nga may yara sang tul-id nga ihibalo pag-abot sa paghupot sang cobra rasun nga gintugyan sini ang nasambit nga man-og.
Matandaan nga nagpost sang statement sa facebook si Garcia agud ma-athag ang pangalan sini bangud kasubong siya ang ginabasol sa kamatayon sang biktima.
