ROXAS CITY-Naglab-ut na sa anum ka mga call center agents ang nagpositibo sa COVID-19 nga nagatrabaho sa isa ka BPO company sa siyudad.
Ini ang ginkompirmar ni City Disaster Risk Reduction and Management Head Mr. Dennis Saneo sang mainterview sang Bombo Radyo Roxas.
Suno kay Saneo nga apat diri ang active cases ukon padayon nga ginabulong samtang duha naman ang dalayon nga nag-ayo sa nasambit nga balatian.
Ginpahayag ni Saneo nga maid-id sa karon ang ginapatigayon nga pag-monitor sa kondisyon sang apat ka mga call center agents nga padayon nga ginabulong.
Hugot naman nga ginatutukan sa karon ang ginapatigayon nga contact tracing sa mga posible na-close contact sang mga nagpositibo nga mga call center agents.
Gindugang pa ni Saneo nga hugot man ang ginapatigayon nga disinfection sang nasambit nga BPO Company agud mangin hilway sa virus ang iban nga mga empleyado.
Ginpanginwala man sini ang mga alegasyon nga ginatago sang nasambit nga kompaniya ang mga empleyado nga nagpositibo.
Ginapahayag nga sa tion makitaan sang mga simtomas ang isa ka empleyado antes pa man makasulod sa edipisyo, wala na ini ginapahanugutan magsulod kag makatrabaho.
Nagapadayon naman ang operasyon sang nasambit nga BPO Company sa pihak nga may yara na sang anum na ka nabalhag nga mga call center agents nga nagpositibo sa nasambit nga balatian.
