Ginkumpirmar sang International Criminal Court (ICC) Registry nga nakabaton ini sang kabug-usan nga 303 ka mga aplikasyon agud kilalahon bilang mga biktima sang war on drugs ni anay Presidente Rodrigo Duterte agud makapasakop sa proceedings sa kaso sang anay Presidente.
Suno sa Victims Participation and Reparations Section (VPRS), limitado lang ini nga numero kon ipaanggid sa numero sang mga biktima sang war on drugs nga luyag magpasakop sa kaso.
Base sa report sang ICC Registry, determinado ang mga biktima nga malab-ot ang hustisya kag luyag nila nga magbulig sa proceedings.
Kaangot sini, ang rehistro sang ICC nagatrabaho sa pagpahibalo kag pagbulig sa mga biktima, ilabi na yadtong mga nadalahig na sa nagligad nga mga paghusay sa korte, para sa isa ka hayag kag inklusibo nga proseso.
Suno sa iya, ang ICC Registry ang nagpagwa sang mga application forms nga nasulat sa Tagalog, Cebuano, English kag French kag nagpatigayon sang mga pagsinapol agud mapahibalo ang mga potensyal nga aplikante sang ila mga kinamatarong kag ang proseso.
Ginpahayag man sang Registry nga nagpatigayon ini sang preliminary assessment sa mga submissions agud makumpirmar ang identity sang kada aplikante, subong man ang risgo nga ila gin-antos kag maid-id nga usisaon kon may kaangtanan ini sa crime against humanity sa kaso nga murder batok kay anay Presidente Duterte.
Gin-establisar ang identity sang mga aplikante paagi sa mga dokumento kaangay sang voter’s ID, barangay IDs kag certified affidavits nga suno sa ICC Registry una na nga gin-aprubahan sang Kamara kag dapat batunon.
Natalana nga magasugod sa Setyembre 23 ang confirmation of charges hearing batuk sa anay Presidente.
