ROXAS CITY – Ginkadismaya sang pamunuan sang Archdiocese of Capiz ang asud-asod nga insidente sang pagpangawat sa mga simbahan sa probinsiya sang Capiz.
Ini ang ginpahayag ni Fr. Jose Arturo Emilio Arbatin, ang tigpamaba sang Archdiocese of Capiz sang mainterview sang Bombo Radyo.
Suno kay Fr. Arbatin, magluwas sa ila nga pagkalisod bangud sang nasambit nga insidente, nagtuga man ini sang pagkabalaka kag kakugmat sa Simbahang Katoliko.
Ginpahayag pa sini nga isa ini ka sahi sang pagtampalas sa isa ka sagrado nga lugar.
Ang simbahan suno kay Fr. Arbatin ang ginakabig sagrado nga duog bangud diri ginkonsagrahan ang santisimo nga ostiya nga ginakabig lawas ni Hesus.
Bangud diri suno kay Fr. Arbatin, ila ginpanugyanan ang mga kaparian sa bilog nga probinsiya sang Capiz nga indi na pag-ibilin ang ostiya sa sulod sang tabernakulo kag sa baylo bitbiton ini pasulod mismo sa kumbento bangud makabig ini nga balaan.
