PANITAN, CAPIZ – Boluntaryo nga ginsungka sang isa ka Barangay Official sang Barangay Agkilo, Panitan ang duha ka yunit sang armas-luthang sa Panitan Municipal Police Station ang ginapahayag nga gingamit sang duha ka suspetsado sa pagtiro sa empleyado sang munisipyo sa amu nga banwa.
Ang wala na ginhingadlan nga Barangay Official ang residente sang nasambit nga banwa.
Sa interview sang Bombo Radyo kay Police Major Amie Bulaqueña, hepe sang Panitan Municipal Police Station, ginpahayag nga ginsungka sini ang duha ka unit sang .45 caliber pistol revolver kag wala sang bala, kun sa diin ini ang ginapanag-iyahan sang duha ka mga suspetsado.
Matandaan nga nagluntad ang isa ka serye sang pagpaarak sang pagpangluthang sang tinalikdan nga adlaw sang Lunes, Mayo 19,2025 kun sa diin maswerte nga nakaluwas ang biktima nga si alyas “Ariel”, 49-anyos, casual nga empleyado sang LGU Panitan kag residente sang Barangay Concencia, sa amu nga banwa. Samtang, madasig naman nga nakapalagyo ang mga suspetsado nga amu sanday alyas “Joseph”, 61-anyos, empleyado sang LGU Panitan, kag alyas “Ramos”, 37-anyos, kagawad kag residente sang Barangay Tinigban, sa nasambit nga banwa.
Dugang pa sini nga ang amu nga mga persona ang nagahupot sang mga armas luthang nga wala sang may nagakaigo nga mga permit kag magapangatubang sa kaso nga Attempted Homicide.
Nahibaluan nga nagluntad ang insidente kabangdanan sang impluwensya sang makahulubog nga ilimnon.
Sa karon, yara na sa paghinakop sang Panitan Municipal Police Station ang nasambit nga armas-luthang kag nagapadayon ang hot pursuit operation sang mga kapulisan batuk sa mga suspek angut na sa nasambit nga insidente.
