Magapadayon ang ICI-Technical Working Group for Asset Recovery sa pagbawi sang mga ginkawat nga pundo kag mga assets gikan sa mga nadalahig sa mga maanomaliya nga mga flood control projects.
Ini bisan pa nga ang Independent Commission for Infrastructure (ICI) mismo ang magatapos sang ila operasyon sa Marso 31, 2026.
Suno kay ICI-Technical Working Group chairperson USec. Renato “Aboy” Paraiso, wala pa sang pormal nga anunsyo ukon direktiba nga nabaton ang grupo gikan sa komisyon, partikular na gikan sa chairman sini nga si retired Justice Andres Reyes Jr., nga nagrekomenda nga tapuson na sang komisyon ang operasyon sini.
Apang, ang Office of the Ombudsman kag ang Office of the Solicitor General nagpabutyag na sang una sang suporta para sa pagpadayon sang technical working group para sa pagbawi sang mga kinawat nga assets.
Suno kay USec. Paraiso, may natumod na sila nga mga mekanismo nga magatugot sa gobyerno nga mabawi ang mga assets nga ginaalegar konektado sa maanomaliya nga mga proyekto.
Apisar nga nagakinahanglan sang malapad nga imbestigasyon kag tracing ang proseso kon diin ginsaylo ang nasambit nga mga assets, nagapati si USec Paraiso nga may progreso na ang grupo.
Base sa pinakaulihi nga data nga gin-istoryahan sa ila pagsinapol, naglab-ot na sa P4.8 bilyon ang balor sang mga recovered kag frozen assets.
