Arestado ang isa ka social media influencer sa Japan bangud sa paghimo kag pagbaligya sang libro nga nagatudlo kun paano hukhukan sang kwarta ang mga “sugar daddies” kag mga “dirty old men”!
Gin-aresto sang mga otoridad ang 25-anyos na si Mai Watanabe sang Naka-ku, Nagoya bangud sa mga libro nga ginsulat sini nga may titulo nga “Textbook for Sugar Babies: The Right Profile” kag “Magical Words to Make Men Pay”.
Ang mga nasambit nga libro ang nagaserbe nga manual para sa mga kababainhan nga gusto makakita sang kwarta pamaagi sa pag-angkon sang “sugar daddy” ukon “dirty old men”.
Suno sa mga nakabasa na sang libro, detalyado ang mga instructions nga mabasa diri. Ginatudlo diri ang kun pan-o magpangita sang sugar daddy, pan-o sila palapitan kag akiton kag kun pan-o ang sakto nga pagpang-into sa mga ini.
Sa isa ka interview sa Naka Police Department, ginpahayag nga nag-umpisa ang pagbaligya ni Watanabe sang mga libro sa iya nga mga social media followers sang 2022. Nagabalor ang mga libro sang 10,000 Yen ukon P3, 700 tubtob sa 20,000 Yen ukon kabaylo sang P7, 400.
Naga-offer man si Watanabe sang face to face private lesson sa mga gusto nga makita sang personal kun pan-o pangwartahan ang isa ka sugar daddy. Antes nga gin-aresto, nakabaligya na ini sang masobra 2,000 ka mga kopya sang mga libro si Watanabe.
Nangin mainit sa mata sang mga awtoridad si Watanabe sang may naaresto sila nga 20 anyos nga dalaga nga nakapang-scam sang 10 million yen sa duha ka mga tigulang nga lalaki sa Aichi Prefecture. Suno sa dalaga, natun-an niya ng mang-scam sa bulig sang libro ni Watanabe. Umpisa sadto, nagpatigayon na sang imbestigasyon ang mga otoridad sa iya.
Bangud sa imbestigasyon, natukiban nga beterano na sa pagpanghukhok sang kwarta si Watanabe bangud may mga report nga kapin 150-million-yen na ang nabaton niya nagikan sa nanari-sari nga kalalakinhan.
