ROXAS CITY – Gindala sa Roxas Component City Police Station ang 30-anyos nga babayi matapos nga ginaalegar nagpangawat takna 1:00 sang maga-aga, Pebrero 25, 2024 sa Sitio Kabulakan, Barangay Cogon, Roxas City.
Ginkilala ang biktima nga si Dennis Bacaro, 36-anyos, mangingisda, residente sang nasambit nga lugar.
Samtang ang ginatudlo suspek amu si Cristena Villaren, 30-anyos residente sang Barangay Dumulog, sini nga syudad.
Sa nakuha nga impormasyon sang Bombo Radyo sa RCCPS, nabugtawan ang biktima sang nabatyagan sini nga may nagakuha sang iya unlan sa diin nakatago ang iya wallet nga may unod nga mas o menus P20,000.
Bangud sini, gilayon nga ginkaptan ni Dennis ang kamot ni Cristena kag gindala sa istasyon sang kapulisan.
Sa karon, ginkustodiya sang Roxas City PNP ang suspek para sa nagakaigo nga disposisyon.
