ROXAS CITY – Nagdangat sa 56 ka mga probinsya sa pungsod Thailand ang narecord nga apektado sang COVID-19 pandemic.
Ini ang ginpahayag ni Bombo International Correspondent Cleo Rose Jondonero sang mainterview sang Bombo Radyo Roxas.
Suno kay Jondonero nga 56 ka mga probinsya, lima (5) diri ang ginakabig nga mga red zone provinces bangud sa pagkapagkit liwat sang madamo nga kumpirmado sa COVID-19.
Ginapahayag sini nga 745 ka mga panibag-o nga kaso ang napagkit sang Enero 4 samtang 527 naman ka mga kaso ang napagkit kahapon nga adlaw, Enero 5 rason nga nagdangat na sa 8,966 ang kaso sang nasambit nga balatian sa bilog nga pungsod.
Dugang pa sini nga wala nagpahanugot si Thailand Prime Minister Prayut Chan-o-cha nga ipaidalum sa lockdown ang lima ka mga probinsya ng yara sa Red Zones sa baylo nga magpatigayon sang hugot nga restrictions kapareho sang checkpoints, work from homes kag iban pa.
Ginapatihan naman nga ang pagpatigayon sang selebrasyon sang nakaligad nga holiday season ang ginatudlo rason sa pagdamo sang kaso sang COVID-19.
Ginkumpirmar man sini nga nakasulod na ang new COVID-19 strain sa Thailand antes nagtakop ang tuig 2020 bangud man sa pagpati nga nagikan sa mga nagaguha-pasulod sa nasambit nga pungsod.
Nagpanugyan naman si Thailand Minister of Education Nataphol Teepsuwan sa 56 ka mga probinsya nga ipaiway anay ang pagpadulong sang mga estudyante sa mga buluthuan kag ginarekomenda nalang ang online classes bangud sa padayon nga pagtaas sang COVID-19.//
Samtang, handa na ang nasambit nga pungsod sa pagbaton sang duha ka milyon ka doses sang COVID-19 Vaccine nagikan sa pungsod China sa masunod nga bulan sang Pebrero kag mangin available naman publiko sa bulan sang Mayo ang Thailand vaccine nga human sang Astrazeneca.
Bangud diri padayon nga ginapatuman ang hugot nga implementasyon sang mga minimum health protocols.
