Nakaguwa na sa Philippine Area of Responsibility ang Bagyong Crising kaina sang aga bangud nagbaskog na ini agud makalab-ot sa Severe Tropical Storm category.
Sa pihak sang pagguwa sang bagyo sa teritoryo sang pungsod, padayon nga ma-eksperyensyahan ang mabaskog nga ulan kag mabaskog nga hangin sa mga lugar sa Northern kag Extreme Northern Luzon bangud sa kadakuon sang sirkulasyon sang bagyo.
Ang ulan nga dala sang Southwest Monsoon ukon habagat ang padayon nga makaapekto sa kalabanan nga bahin sang pungsod.
Ulihi nga naobserbahan ang sentro sang bagyo sa 235 km West sang Itbayat, Batanes sa guwa sang PAR.
May kabaskugon ini sang hangin nga 100 km/h malapit man sa sentro kag pagmadlos tubtob 125 km/h.
Nagahulag man ang bagyo pa-West nga may kadasigon man nga 15 km/h.
Ang Batanes, western portion sang Babuyan Islands, kag Ilocos Norte ang yara sa idalum sang TCWS NO.2.
Epektibo namang sang TCWS NO. 1 ang nabilin nga bahin sang Ilocos Norte, Ilocos Sur, northern portion sang La Union, Abra, Apayao, Kalinga, kag nabilin nga bahin sang Cagayan.
Lauman man ang mabaskog nga pag-ulan subong nga adlaw kag bwas nga adlaw sa ibabaw sang Apayao, Abra, Ilocos Norte, kag Ilocos Sur bangud sang Bagyong Crising.
Lauman man ang maulanon nga panahon subong nga adlaw tubtub buwas diri sa Metro Manila, Pangasinan, Zambales, Bataan, Tarlac, Pampanga, Bulacan, Palawan, Romblon, Occidental Mindoro, kag Antique bangud sang southwest monsoon nga ginpabaskog sang bagyo.
Sa subong, wala pa sang bag-o nga grabe nga panahon nga naporma sa gwa kag sa sulod sang PAR.
