ROXAS CITY – Nagaagunto ang pila ka mga firecrackers vendors sa pagbaligya sang mga nanari-sari nga mga palupok sa Pueblo de Panay, Barangay Lawaan, Roxas City.
Ini ang ginpahayag ni Vidal Alantason presidente sang Firecrackers Association sang mainterview sang Bombo Radyo.
Suno kay Alantason maiwat ang baligyaanay subong nga tuig bangud sa pandemya.
Apang wala sila sang mahimo kundi ang mag agwanta na lang bangud ini lang ang ila nga pangabuhian.
Mahibaluan nga ini lang ginasaligan subong sang mga manugbaligya sang mga palupok subong nga bag-ong tuig apang tuman ka hinay ang ila nga kita.
Ginpahayag naman ni Fire Senior Inspector Rowell Limjuco, Acting City Fire Marshall sang Roxas City Fire Station nga padayon sa gihapon sila sa pagmonitor sa mga nagabaligya sang palupok sa nasambit nga area.
Kinahanglan man nga dapat may yara sang mga fire extinguisher sa tion nga may yara sang magluntad nga insidente sang sunog.
Ginabantayan man nila ang mga vendors nga nagabaligya sang mga ginadumilian nga mga palupok.
Dugang pa sini nga kun mahimo indi maggamit sang mga palupok agud malikawan nga makapagkit sang insidente may kaangtanan sa palupok.
