Hugot nga ginpanginwala sang city government sang Baliwag, Bulacan ang kahilabtanan sini sa gina-alegar P55 million nga “ghost project” sa flood control nga gin-usisa ni Presidente Ferdinand Marcos Jr. sa Barangay Piel sang Agosto 20.
Sa isa ka opisyal nga pahayag gikan sa lokal nga panguluhan sini nga Huwebes, Agosto 21, ginpahayag sini nga ang proyekto—isa ka reinforced concrete river wall sa Purok 4—ang “eksklusibo nga ginpatuman, ginpondohan, kag ginbayaran sang Department of Public Works and Highways (DPWH),” suno sa isa ka dokumento gikan sa Malacañang.
Ginaalegar nga wala nag-agi sa syudad ang proyekto kag wala man sang dokumento nga ginsumiter sa City Engineering Office, kag wala man sang koordinasyon sa anuman nga talatapan sang LGU.
Una na nga gintawag ni Presidente Marcos nga “questionable” ang proyekto matapos makabaton sang report nga ginaalegar wala nagaluntad ukon substandard ang istraktura.
Ginpakamalaot man sang LGU ang nasambit nga proyekto sa diin gintawag ini nga “fraudulent” kag maathag nga pag-usik sang pundo sang publiko.
Una diri, ginmando ni Marcos Jr ang gilayon nga pag-blacklist sa kompaniya nga SYMS Construction Trading nga imbolbado sa amo nga proyekto kag tuyo man sini nga pasakaan sang panumbungon batok diri sa idalum sang Anti-Graft and Corrupt Practices Act kag malversation of public funds pinaagi sa pagpalsipikar sang public documents.
Ginpangabay man sini ang publiko nga i-report ang mga makaduluda nga proyekto paagi sa ”Sumbong sa Pangulo” website.
