Nagapabilin sa short-term solutions kag wala sang matuod nga long-term strategy ang El Niño sa Pilipinas.
Sa nagahilapit nga “Super El Niño,” ginpatuman sang Department of Agriculture “DA”, ang pila ka tikang kaangay sang pagbalhin sang tubig sa pananom, pag-adjust sang planting calendar, kag paggamit sang solar-powered irrigation, kaupod ang koordinasyon sang National Irrigation Administration “NIA”.
Apang suno sa mga eksperto, ini nga tikang short-term ukon limitado, bangud sa malawig mabatyagan ang El Niño lakip na ang indi mabanta kon san-o magaulan nga nagaresulta sa kakulang sang tubig kag problema sa produksyon sang pananom.
Dugang pa sa impormasyon ang irrigation system, indi magamit kon kulang ang supply sang tubig sa mga dam kag reservoir, kaangay sa natabo sang 1997 tubtob 1998 nga isa sa pinakamainit nga El Niño sa kasaysayan.
Samtang, ginpahayag man nga mas daku pa ang problema sa suplay sang bugas sa pungsod.
Ginatunaan nga posible mag-abot sa 3.6 tubtob 6 ka milyon ka metriko tonelada ang kinahanglan nga importasyon sang bugas, samtang ang buffer stock sang National Food Authority “NFA”, yara nalang sa 7 tubtob 15 ka adlaw-malayo sa 30 ka adlaw nga standard sang iban nga pungsod sa ASEAN.
Ginpahayag man nga ang sobra nga pagsalig sang Pilipinas sa importasyon halin sa Vietnam mahimo magtuga sang mas daku nga problema kon maapektuhan man ini sang El Niño.
Sa pihak sini, ginarekomendar ang mas sistematik nga solusyon kaangay sang pagdugang sang buffer stock, pagpalapad sang import sources pareho sa Thailand, India kag Pakistan, kag pagpatuman sang suporta sa mga mangunguma.
Ginatudlo man ang importansya sang dietary diversification ukon pag-lain sang ginakaon sang mga Pilipino, bangud sobra ang pagsalig sa bugas nga nagaabot sa 119 ka kilo kada tawo kada tuig nga isa sa pinakadaku nga ginakunsumo.
Gina-engganyo man ang publiko nga magbalhin sa mas masustansya kag mangin resilient sa pagkaon pareho sang brown rice, utanon kag alternatibo nga pagkaon kaangay sang adlai, kamote kag mais agud mapabakod ang food security.
Sa kabug-usan, ginapakita sang nagligad nga ang epekto sang El Niño wala pa gid nakabaton sang insakto nga long-term solution para pungsod, gani ginahingyo ang gobyerno nga magpatuman sang mas malawig kag komprehensibo nga polisiya agud malikawan ang krisis sa palaabuton.
