ROXAS CITY – Liwat naman nga nakabalhag sang kaso nga pagpangawat ang Barangay Loctugan.
Ini ang ginkumpirmar ni Punong Barangay Lilian Baltero Cordenillo sang mainterview sang Bombo Radyo.
Suno kay PB Cordenillo, ginkilala ang biktima kay Nanay Bebing, tag-iya sang computer shop kag residente sang Sitio Lupog sa amu nga lugar.
Sa panaysayon sang biktima ginpahayag sini nga natabo ang insidente takna alas 3:00 sang kaaganhon kung sa diin mahamuok na ang tulog sang iya pamilya.
Posible suno diri nga pinaagi sa pagbringka sang pirtahan natigayon nga makasulod sa ila puluy-an ang wala pa makilan-an nga kawatan kag nakuha ang 2 ka unit sang cellphone.
Dugang pa nga nakuha ang isa ka bag apang sang ulihi nakit-an man ini sa bakante nga lote malapit sa ila puluy-an.
Maswerte lamang suno sa biktima nga wala sang sulod nga kwarta ang amu nga bag bangud sa pagkamatuod suno diri nagaproblema pa ang mga ini para sa galastuon sa ospital sang iya anak.
Bangud sini, ginpasiguro sang Punong Barangay nga ila ini pungkuan kaupod ang mga opisyales agud mahinalaan ang mga kinahanglan nga aksyon nga ila ipatuman sa baranagy.
Samtang tinguhaan man nila nga mga opisyales suno diri nga pahamtangan sang Closed-circuit television (CCTV) ang mga pasuludlon nga lugar.
Panugyan na lamang sini sa iya nasakupan nga indi mangin kampante sa tanan nga oras bangud sa subong nga tyempo nagapati ini nga wala sang ginapili nga panahon ang mga kawatan.
