ROXAS CITY – Mabaskog ang pagpati sang Capizeño nga abugado nga nangin basehan sang Department of Justice sa pagpasaka sang kaso nga paglapas sa Section 5 sang Dangerous Drugs Act batuk kay Senator Leila de Lima ang pag-ako kag testimoniya sang mga inmates nga daku ang partisipasyon sini sa paglapta sang iligal nga droga sa National Bilibid Prison.
Suno kay Atty. Nelson Borja, posible nga wala napasakaan sang kaso ang senadora kun nagtambong ini sa preliminary investigation sa DOJ kag nakasumite sang affidavit.
Apang posible nalimtan ukon mas nagpati ang kampo ni de Lima nga sa Office of the Ombudsman ukon Sandiganbayan ang proper venue sa pagpasaka sang kaso kun ang involved isa ka public official.
Apang suno kay Borja nga may specific provision sa Dangerous Drugs Law nga ang hurisdiksyon sa mga kaso may kaangtanan sa droga ang ginpaidalum sa RTC nga designated sang korte suprema.
Nakadepende man sa huwes ang pagpaguwa sang warrant of arrest bangud may napulo ka adlaw sila para tun-an ang kaso.
Samtang mahimo pa nga malutsan sang senadora ang kaso pinaagi sa pagfile sang motion sa Regional Trial Court sa Muntinlupa.
Pananglitan nga ma-deny ang iya nga motion mahimo ini nga magfile sang petition sa korte suprema.
