Ginpahayag sang pamaunuan sang National Food Authority Capiz Branch Office nga ang P20 kada kilo sang bugas sa idalom sang ‘Benteng Bigas Meron’ (BBM) na program ang isa ka dako nga bulig indi lamang para sa mga benepisyaryo sini kundi pati na sa mga mangunguma.
Sa interview sang Bombo Radyo kay Mr. Andy P. Ostan, Acting Branch Manager sang National Food Authority (NFA) Capiz Branch Office, iya ginpahayag nga ginasiguro sang ila nga ahensya nga de-kalidad gid ang bugas nga ila sini nga ginabaligya.
Dugang pa sini nga ang nasambit nga programa, nagahatag man sang kahigayunan sa mga mangunguma nga makabaligya sang madamo sang ila sini nga ginpang-ani nga palay sa ahensya.
Nahibaluan nga sang tinalikdan nga Hunyo 30, 2025, opisyal nga ginlunsyar ang ‘Benteng Bigas Meron’ (BBM) na program sa National Food Authority (NFA) Capiz Branch Office, Barangay Lanot, Roxas City kag una nga naka-avail sang amo nga programa ang mga construction workers.
Nagapasalig naman ang ahensya nga magapadayon ang nasambit nga programa sa probinsya.
Samtang, panagabay naman ni Ostan sa mga kunsumidor, nga kuntani mas pakamaayuhon nga ang baklon nga bugas amo ang mga locally produced agud nga mahimo man nga makabulig sa lokal nga mga mangunguma.
