Malipayon nga ginapahibalo sang Bureau of Fire Protection (BFP) Capiz nga kompleto ukon bastante ang fire trucks sa probinsya.
Sa interview sang Bombo Radyo kay Senior Fire Officer (SFO) 1 Atty. Joenel Cortez, Acting Chief sang Investigation Unit sang BFP Capiz, iya ginpahayag nga may yara sang 30 ka active fire trucks sa probinsya nga handa magresponde sa mga emerhensya kag sunog.
Apang sa pangkabug-osan, may yara sang 31 ka fire trucks ang Capiz, apang isa diri ang gindeklara nga unserviceable bangud may problema sa fire pump.
Ang nasambit nga fire truck iya sang Roxas City Fire Station kag yara pa sa proseso sang pagkaayo.
Suno kay Cortez, adlaw-adlaw gina-check ang overall condition sang fire truck agud masiguro nga safe kag maayo ini gamiton sa pagresponde sa emerhensya.
May regular inspection kag preventive maintenance man nga ginahimo ang BFP sa diin kabahin sini ang ila daily morning activities, kun sa diin ginacheck ang physical condition sang mga fire trucks.
Ginapatuman man ang motor vehicle daily safety checklist agud mahibaluan gilayon kun may problema ukon depekto ang isa ka unit.
Apang isa sa mga ginakabalak-an sang BFP amo ang edad sang pila ka fire trucks bangud may mga unit nga yara na sa edad nga 40 tubtob 45 ka tuig kag nagakinahanglan sang major repair kag regular nga maintenance.
Suno kay Cortez, kun mahimo pa, mas maayo nga ma-decommission na ang tuman na katigulang nga mga fire trucks, apang indi ini gilayon mahimo bangud wala pa sang mga bag-o nga unit nga ibulos.
Apang pahayag niya, padayon man ang procurement sang BFP National Headquarters agud madugangan ang mga fire trucks sa nagkalain-lain nga lugar sa diin ang mga local government amo ang nagabulig sa pag-follow up sa national government para makakuha sang dugang nga fire trucks para sa Capiz.
Sa Roxas City naman dugang niya, isa sa mga ginatutukan nga concern amo ang kinahanglanon sang dugang nga fire truck bangud target ang pito ka fire trucks para sa syudad, apang anum lamang ang yara sa subong.
