ROXAS CITY – Nagapadayon sa karon ang imbestigasyon sang mga katapo sang Bureau of Fire Protection (BFP)-Panitan sa nagluntad nga sunog sa merkado publiko sang ila banwa.
Sa interview sang Bombo Radyo kay Senior Fire Officer 3 Ramil Arquisola, Municipal Fire Marshal sang Panitan, ginsiling sini nga wala pa sang tul-id nga rason sa gintunaan sang kalayo sa nagluntad nga sunog, apang may ginasundan sila sa karon nga anggulo nga posible makabulig sa ila imbestigasyon.
Ginpahayag sini nga sa ila inisyal nga pag-imbestigar nga nagikan sa ibabaw ang kalayo kun sa diin may yara sang nag-spark kag gindakop ang trapal nga madasig gilayon naglapta sa iban nga stall.
Gindula man sini ang alegasyon nga ginhungod sunog ang amu nga baligyaan.
Matandaan nga isa ka puwesto nga ginapanag-iyahan ni Rosalie Bechayda ang totally burned, samtang onse ka iban pa ang partially burned, sa nagluntad nga sunog sa nasambit nga merkado, sang tinalikdan nga gab-i.
Wala man sang tawo nga naulamid sa amu nga insidente.
