Ginkumpirma sang Bureau of Immigration nga nakabisita pa sa Pilipinas sang nagligad nga bulan ang mga suspek sa mass shooting sa Bondi Beach sa Australia.
Suno kay BI spokesperson Dana Sandoval, sanday Sajid Akram, 50 anyos kag Naveed Akram, 24 anyos, ang nag-abot sa Pilipinas sang Nobyembre 1 nagikan sa Sydney.
Pahayag niya, si Sajid Akram ang isa ka Indian national (Australian resident) samtang ang iya anak ang isa ka Australian national.
Base sa reports suno kay Sandoval, ginapahayag nga sa Davao ang final destination sang mag-amay.
Nagbiya sa pungsod ang duha sang Nobyembre 28 pinaagi sa connecting flight nagikan sa Davao pakadto sa Manila kag sa Sydney ang ila final destination.
Ini kasunod sang na-report nga ginaimbestigaran sang police authorities ang mag-amay sa rason sang ila pagpadulong sa Pilipinas.
