ROXAS CITY – Gindepensahan sang bise-alkalde sang banwa sang Panit-an ang natalana nga seminar nga pagatambungan sang pila ka miyembro sang Sangguniang Bayan sang nasambit nga banwa nga patigayunon sa Villa Paraiso Resort, Camiguin Island humalin Oktubre 23 tubtob 25, 2019.
Suno kay Vice Mayor Byron Delfin nga gin-imbitar sang JPLCV Center for Academic Values Foundation Inc. ang lokal nga gobyerno sang banwa nga magtambong sa Executive Forum on Fiscal Management and Procurement.
Sa amo nga aktibidad suno kay Delfin, ipahangop ang Republic Act 9184 ukon Government Procurement Reform Act kag Fiscal Administration nga magamit sang mga miyembro sang konseho sang banwa pag-abot sa ila nga oversight function sa pagtsekyar sang trabaho sang mga departamento sa idalom sang executive department.
Suno kay Delfin nga apisar magagasto sila para sa nasambit nga aktibidad, dako naman ang mabulig sang seminar sa lokal nga gobyerno sang banwa.
Ginpasalig man sang bise-alkalde sa mga pumuluyo sang banwa nga mangin mapinuslanon ang executive forum para sa mga miyembro sang konseho sang banwa sang Panit-an.
Mahibaluan nga kalakip sa magatambong sa nasambit nga aktibidad amo sanday Sangguniang Bayan (SB) members David Felix Bauson, Liberato Degones, Jr., Veronica Delfin, Nena Arches, Marites Versosa, Ricarte Dorado, kag ex-officio member Sangguniang Kabataan (SF) Federation President Keith Jay Aducal.
