ROXAS CITY –Nagbalik na ang biyahe sang mga sakayan pandagat sa probinsya sang Capiz partikular na sa Culasi Port, Barangay Culasi, Roxas City matapos nga temporaryo ini ginsuspinde bangud sa epekto sang Bagyong Ofel sa pungsod.
Ini ang ginpahayag ni PCG-Capiz Station Commander Lt. Edison Diaz sang mainterview sang Bombo Radyo.
Suno kay Diaz nga nagpaguwa sila sang Sea Travel Advisory No. 2 kun sa diin ginapahanugotan na makabiyahe ang mga sakayan pandagat gikan sa Culasi Port padulong sa Batangas Port vice versa.
Ini matapos nga nga nakabaton sila sang PAGASA Severe Weather Bulletin number 14 tubtob 15 sa opisina nga wala na sang Tropical Cyclone Warning Signal (TCWS).
Magluwas diri, ginapanugyanan man nila ang pila ka mga mangingisda nga indi magpalawod kun malain ang lakat sang panahon kag yara man ang ila coast security patrol nga nagabantay.
Ginpahayag ni Diaz nga nagapatigayon sila sang thermal scanning kag iban pa nga mga proseso sa mga pasahero agud masiguro nga wala sang COVID-19 virus ang mga nagaabot sa Puerto apisar nga aprubado na ini sang ila tagsa ka mga LGU’s.
Dugang pa sini nga wala man sang mga stranded individuals subong apang ginalaoman na ni Diaz nga magadamo ang magapauli bagud sa nagahilapit nga “All Souls Day kag All Saints Day”.
Samtang, ginpasiguro man sini nga ginasunod man sang mga coast guards ang pag-implementar sang mga minimum health protocols kontra COVID-29.
